Nuwe Jy 60 dae-uitdaging

Ek klim huiwerig op die skaal, nie seker wat om te verwag nie. My vernuwingsreis het immers skaars begin. Maar toe ek afkyk en die nommers sien, bokspring my hart. Ek het nie eens geweet ’n mens kan so goed oor jouself voel nie! Reg aan die begin van die program, ná ons detoks van vier weke, was dit wonderlik om reeds ’n verskil van buite af te kon waarneem. Maar, belangriker was die verandering aan die binnekant. Ek het sleg gevoel oor myself en alles begin bevraagteken. Gewonder of ek nog as haarkapper moet werk … Dis immers ’n beroep waar jy mense mooi en goed moet laat voel. Maar hoe doen ’n mens dit as jyself lelik en ellendig voel? Vandag is ek so bly dat ek deurgedruk het. Ek wil dit vir die hele wêreld uitbasuin: My sprankel is terug! Ek voel nes daardie emoji met die twee sterretjies as oë. As my ore nie in die pad was nie, was my glimlag wraggies reg rondom my kop. Wat ’n ongelooflike reis na innerlike en uiterlike vernuwing!

Ons het Durban toe gevlieg vir ’n verrassings-verjaarsdagpartytjie vir een van ons vriende wat my maande laas gesien het – en hierdie keer, met my Nuwe Jy-lyf, was alles anders … Reeds op die vliegtuig was dit ’n groot lekkerte om uiteindelik gemaklik in die sitplek te kon pas en die gordel sonder moeite vas te gespe. Die kersie op die koek was egter toe ons vriend by die partytjie opdaag. Ek sal sy gesig nooit vergeet nie. Hy het gekyk, wéér gekyk en toe verstom uitgeroep: “Wat de hel, jy lyk ongelooflik! Ek kan nie glo dis jy nie. Wat het jy gedoen?” Die res van die aand het nóg komplimente gevolg. Dit was ’n wonderlike gevoel. Ná al die opwinding was ons skoon uitgeput tydens die vlug terug huis toe. Ek en my man het albei met toe oë gesit, terwyl hy my hand styf vashou. In daardie oomblik het ek die hartklop-ritme van liefde in ons hande gevoel en besef: Hierdie is maar net die begin van ’n opwindende nuwe hoofstuk sonder die seuns … Dis toe ek wéét: Ek het oorwin!

Ek het sommer vooraf geweet: Hiérdie gaan een van die grootste toetse nog wees. Sukses gaan afhang van hoe graag ek my doelwit wil bereik. Dit was aan die begin van die skoolvakansie toe ons hele familie saam vir ’n naweek weggegaan het na ’n “lodge” toe. Almal het die heeltyd geëet en gekuier en ek moes kophou en mooi dink wat ek in my mond gaan sit en wat nie. Was ek bereid om al die harde werk tot niet te laat gaan vir ’n stukkie kortstondige plesier? Want dit vat jou liggaam drie dae om weer op koers te kom. Soms was dit moeilik. Die pizza, tjoppies en braai-ontbyte het só lekker gelyk, maar ek is dankbaar dat ek kon kophou en op die einddoel konsentreer. Die resultate het alles die moeite werd gemaak. Hierdie reis is lewensveranderend. Ek sukkel nog om te registreer dat dit werklik die nuwe ek is – van ’n nommer 16 gekrimp na ’n 12 toe! Met elke kilo wat ek verloor, kry my selfvertroue ’n hupstoot. Ek voel weer lief vir myself, gemaklik in my lyf en wil dinge dóén.

My hele perspektief het verander. Ek kyk nou na die wêreld deur ’n rooskleurige bril. Elke dag voel soos Vrydag. Daar is nie meer blou Maandae nie. Wie sou ooit kon dink dat om gewig te verloor en meer oor jouself te leer, so ’n groot impak op jou psige kan hê. Dis wonderlik om minder geïrriteerd met myself en ander mense te wees, en ek het baie meer geduld. Ek het geleer om op te hou leuens oor myself glo. Dat ek nuwe waarhede moet uitspreek en lééf. Vroue is wonderbaarlik geskep. Ons is uniek en kosbaar, uitverkies, geliefd en sterk. Nooit weer gaan ek dink ek is net gemiddeld nie. Ek is soveel meer! Ook, dat as jy beter verhoudings wil handhaaf, moet jy eerder fokus op die positiewe aspekte. Laat gaan dít wat jou terughou en waaraan jy niks kan doen nie. Jy kan nie iemand anders verander nie. Kyk eerder na jouself. En wat kos betref… dis so bevrydend! Danksy hierdie program wat ’n leefstyl geword het, het kos nie meer ’n houvas soos voorheen nie. Die mag is nou terug in my hande.

“My vrou, jy klink en lyk soos ’n nuwe jy!” My man se woorde, en dit beteken so baie! Vroeg in die jaar het ek ervaar dat die Here vir my sê dat Hy my hierdie jaar gaan leer. Ek sien dit nou duidelik raak. Aan die begin was dit ’n groot verrassing dat die Nuwe Jyprogram nie net op gewig en kos fokus nie, maar op die hele pakket. Vel, hare, tande … en jou hart. Ek het dit beslis nodig gehad. In mý lewe het dit veral verhoudings kom herstel. Hoe verder ek gevorder het, hoe gelukkiger het ek in myself begin voel. My man het dit raakgesien en self ook dinge begin doen om my gelukkig te hóú. Stelselmatig het dit ons huwelik versterk. Hyself wou ook naderhand gesonder eet en oefen, en het ons ingeskryf vir Parkrun. Nou doen ons soggens saam push-ups, en op Sondae gaan draf ons met die twee honde. Lekker kwaliteittyd! Ek is gretig om alles wat ek geleer het met ander te deel. Ons almal verdien die kans om geluk en vrede in onsself te vind.

As ma van ’n serebraal-gestremde seuntjie is daar baie dinge wat ek nie kan beheer nie. Hierdie reis het egter my vermoë verbeter om die uitdagings te hanteer waaraan ek niks kan verander nie. Nou het ek die dapperheid en durf om die dinge te verander wat wel binne my vermoë is. Met die ekstra gewig het ek fisiek begin sukkel om Eckart (6) alleen te hanteer. Gou het ek besef dat om fisiek sterk en gesond te wees, my die beste kans gee om hom beter te versorg. Dis nou baie maklik om saam met hom op die mat te sit, of om hom alleen winkel toe vat. Ek weet my mooi hare, tande en slanker lyf gaan nie my kind se diagnose verander nie, maar dit verbeter die huidige en die toekoms. Vir iemand met FOMO (“fear of missing out”), en wat altyd lus is vir iets lekkers, raak ek nie meer angstig as dinge soos beurtkrag my nuwe leefstyl-roetine beïnvloed nie. Party mense sê “ag shame” as ek nee sê vir pizza of burgers saam met die res van die gesin. Dis nie “shame” nie … dis ’n oorwinning!